FAAMATALAGA E UIGA I LE EKALESIA LMS SAMOA MAI LE FAATONU AOAO |
||
Saunoaga Mai le Faatonu O lea ua lau i ula ae pou i toa le fale nai Amoa ae fola i le manuula le maota o le Tuimanu'a, ma ua fuga ai nei le a e pei o le faiva o Seuga, ua liligo ai nei le fogatia ma ua pau le tuaau ma Fuamalu, aua ua ou tepa i ula ua ou tago i ula, ua futifuti manuula le taeao manaia. Aua sa tapu lala nei le vaa o le Tuimanu'a ae sili ofe a le tautai ina ua to'a i fanua le igafo i Tuaau. O faiva foi ua mataina pe faapulou i le tualima e pei o le upu ia Ulumu ma le Lefaoseu ua faamalo le fai o le faiva. Ma ua olioli ai nei livaliva le agaga, aua o le faamoemoe ua taunuu o le laau lea o le soifua. Leitoa foi ona alaga le tama Eperu ma faapea ane: "Lo'u agaga e, ia faamanu atu i le Alii, o mea uma foi o i totonu ia te a'u ia faamanu atu i lona Suafa Paia" Ou te faatalofa atu i le Suafa mamalu o lo tatou Alii o Iesu Keriso le Ao o le Ekalesia, ia i latou uma o le a faitau i nei tusitusiga e faatatau i lenei Ekalesia, atoa ai ma lona afuafua mai i le tausaga na faavaeina ai. O le suafa o le Ekalesia ua faaaogaina nei o le LMS Samoa na autasi i ai finagalo i le tofa ma le uta a le au fueloloa ma le aufaiuta i le aulotu i Papatoetoe i Aukilani i Niu Sila i le tausaga e 2002 e faaigoaina ai le aulotu fou na faavaeina i lea tausaga. O le faamoemoe, ina ia toe faaolaolaina le suafa o le lotu na taunuu atu i Samoa i le 1830, na suluia ai Samoa i le malamalama o le Tala Lelei. Na resitalaina le ulua'i LMS Samoa i Papatoetoe i le aso 5 Mati i le 2002, ma le tatalo ina ia tuputupu pea lenei galuega fou ua tau lalagaina. O le tausaga e 2003 na faavaeina ai se isi lala fou i Manurewa, o le tausaga e 2004 na faavaeina ai le aulotu i Papakura, o le tausaga e 2005, na toe faatuina ai se isi aulotu i Magele ma le tausaga e 2006 o le aulotu i Logan City, Brisbane i Ausetalia. O le faamoemoe o le toe taulalagaina o le LMS Samoa i lona faavae ua i ai nei, ina ia faamama avega i nai aiga lima vaivai, ae o lo o lagonaina le fia galulue ma le fia mafuta atu i aulotu, ae ua le gafatia mea e fai i totonu o ekalesia. I le faavae lava ia a le LMS Samoa, ua faataoto ai nei, e tasi lava le foai e te faia i totonu o Sauniga i Aso Sa, ua na o le taulaga (sene) faalilolilo mo le atina'e o le galuega i le itu i le tino.E pule le aulotu i nisi auala e saili ai seleni mo le atia'e o le galuega a ia faamama. E fai foi mealofa mo le aufaigaluega faifeau o lo o tausia aulotu, ae e i le aulotu lava ma le faifeau i le faiga o ia mealofa. E le mafai foi ona tolaulauina nei mealofa i totonu o le falesa ua na o le aofaiga e faailoa i le aulotu e le failautusi.. Faalavelave i totonu o aulotu O so o se maliu (tulou) e faiva i totonu o se aulotu a le LMS Samoa, ua uma ona faatulagaina, ua na o le tasi lava le ie tele e faaaoga mo le mavaega, faatasi ai ma le mealofa tupe e tuuina atu i le aiga ua mafatia e fesoasoani ai i le faalavelave, ma le faamoemoe e le toe foi mai se mea e tasi o lenei foai, ua masani ai tagata lotu uma aua e tofu oo uma i ai i lea vaega. Vagana ai nisi faamoemoe e pei o aso fanau ma faaipoipoga e pule lava le aiga ia i le faatinoina o ia aso fiafia. E le alo ese le ekalesia ma le aganuu, o lo o faaaogaina pea e le ekalesia aganuu ma tu a Samoa a ia fai ma le alofa ma ia faamama. Itutino o le Ekalesia ma le aufaigaluega faifeau ma a'oa'o O le ekalesia aoao ua fausia mai i le nofo a matagaluega e afua mai i ni pulega se lua po o le sili atu foi ua tuufaatasi, ma ua tofu ia pulega ma faifeau toeaina. O le pulega e maua mai i ni aulotu se lua po o le sili atu foi ua tuu faatasi e ala i le ta'ita'iga a le faifeau toeaina.O le aulotu ua faavaeina mai i ni aiga se lua pe sili atu foi ua autasi ina ia faavaeina se galuega ma ua uma foi ona faapaiaina e avea ma aulotu ma ua i ai foi ma ni tiakono. O le sailiga o faifeau galulue i totonu o le Ekalesia Samoa, e filifili mai lava i a'oa'o ua pasi mai le suega o i latou e sauni i le galuega faa faifeau, o lea suega e faia i Aso Toona'i mulimuli o Novema i tausaga ta'itasi. O le isi suega e ta'ua o le suega a a'oa'o fesoasoani e faia i Aso Toona'i mulimuli o Oketopa i tausaga ta'itasi. E lua suega a a'oa'o i le tausaga o le suega a a'oa'o fesoasoani e lagolaosua i le faifeau o le aulotu, ma le suega a a'oa'o mo i latou e sauni ai mo le galuega faafaifeau. Afai ua e pasi i le suega a a'oa'o fesoasoani ae ua e mana'o e te fia galue o se a'oa'o tausi aulotu, ona toe ave lea o lou suafa i le fono a le autoeaina mo le taliaina ona e toe su'e lea i le suega mo i latou e sauni mo le galuega faafaifeau. Afai ae filifilia se a'oa'o tausi aulotu, e se aulotu e galue ai, ona osi lea o le feagaiga, ae faatoa faauu lou tofi e avea ai oe o se faifeau faamaoni ma maua lou tusi pasi e galue i le faia o Sakaremeta uma i le fono o le tausaga o lumana'i, o lea faauuga e fua i le ripoti a le faifeau toeaina o lo o e galue ai. E tolu tausaga e galue ai le faifeau i se aulotu ona faia lea o se malologa mo le tolu masina, ae taoto i le aulotu mo se latou filifiliga i le toe foi mai ma le leai.Afai ua le mana'o ai le aulotu e toe mafuta ma le latou faifeau, e tatau lava ona toe foi mai le faifeau e tatala le feagaiga, ma toe faafoi ie o le feagaiga na osia ma lea auauna. O le faamoemoe ina ia tatala le feagaiga ma avanoa ai loa le aulotu mo le osia o se isi feagaiga fou.Afai ae le foi mai le faifeau e tatala le feagaiga ona le mafai lea ona toe faaaogaina o se faifeau a le LMS Samoa, se'i vagana ua faailoa mai i se tusi le mafuaaga e iloilo e le fono a le autoeaina. O lo o i ai foi se tasi aso mo malologa a faifeau e taua o le faafouina, e faia i tausaga uma pe a uma le lotu tamaiti, e malolo ai i le tasi le vaiaso. Osiga o feagaiga a aulotu ma faifeau Afai ua filifilia se faifeau e galue i se aulotu a le LMS Samoa, ma ua sauni foi e osia le feagaiga, e matua faatauaina e le faavae le i ai o ie (toga) e taua o ie o feagaiga, ina ia faapaiaina i totonu o le malumalu i le taimi o le osiga o le feagaiga. O lea faamoemoe, o le faailoga vaaia lea o le feagaiga ua osia i le va o le faifeau ma le aulotu i luma o le Atua, ona o lona finagalo. O nei ie e le mafaia ona faaaogaina e le aulotu po o le aiga foi, faatoa toe vaaia nei ie i le taimi o le tatalaina o le feagaiga ina ua le toe galulue faatasi ai le faifeau po o le aulotu po o ua maliu foi le faifeau. |
Tulaga tofi o le Ekalesia Lms Samoa O tofi o le Ekalesia Aoao e amata mai le Faatonu Aoao, e na te vaaia le faavae ma itu tino uma o le Ekalesia atoa ai ma le silasila toto'a i itu e aafia ai le aufaigaluega. O ia foi o le Ta'ita'i Fono o le Fono a le Au Toeaina.O le Faatonu Aoao e filifilia mai i le vasega o Faifeau Toeaina a le ekalesia. O le fono a le autoeaina e silasila ai i mataupu ua aafia ai le aufaigaluega faifeau ma a'oa'o, atoa ai ma ni mataupu ua aafia ai le faavae. O faifeau toeaina o pulega ta'itasi e tofia mai e le Faatonu aoao, e ala i se fautuaga mai le fono a le autoeaina. O le Ta'ita'i Fono ma lona Ofisa, e aofia ai le Failautusi ma le Teutupe, latou te faafoeina fonotaga a le ekalesia ma faia faaiuga o mataupu uma o le fono. O le Ta'ita'i Fono ma lona ofisa e filifili mai i faifeau, a'oa'o, tiakono, e ala i le palota a le fono tele. O le tiakono Toeaina e auai atu i le fono a le autoeaina mo le faaooina atu o ni mataupu e finagalo i ai le vasega o tiakono. E tasi lava le Tiakono Toeaina a le Ekalesia Aoao, e malaga foi e asiasi i aulotu uma o le ekalesia aoao, i tausaga ta'itasi mo sana ripoti i le fono a le autoeaina pe a tauaofia le fono tele. E i ai foi le taimi o le fono tele e faailoa atu e le failautusi o le fono, e feiloa'i ai le Tiakono Toeaina ma le vasega o tiakono o lo o usufono.O le tiakono toeaina e filifili mai le vasega o tiakono, ma e palotaina i totonu o le fono tele. O le Mafutaga a Tina, ua i ai lava lo latou Peresetene, e filifilia lava e tina i le taimi o le fono tele, e i ai foi taimi o a latou sauniga ma fonotaga i taimi o le fono tele. O nei tofiga uma e aofia ai ma le aufaigaluega faifeau, e leai se taimi faatapulaaina e te galue ai i se tofi, se'i vagana ai ua faamavae, maliu, gasegase, po ua aafia oe i ni solitulafono faa le malo ma ua faamaonia, faaoolima mataga, faamaligi toto, po ua faamalolo mai foi e le fono a le autoeaina ou tofiga ona faatoa faamutaina lea. Afai ae aafia lou tulaga tofi o lo o e galue ai, e le mafai ona e toe galue i nei tofiga, e faasalaina oe pe afai o se faifeau po o se a'oa'o i le tolu tausaga, ma faamoemoe i le ripoti a le faifeau toeaina o lo o e galue ai i le taimi o lou faasalaga, ona e toe foi lea i lou tofi faifeau po o le a'oa'o foi. Afai ae faasala oe ae e alu ese ma ua e le toe galue i se aulotu a le LMS Samoa, ae faatoa e toe foi mai pe a uma le tolu tausaga, e le toe taliaina lava oe. Afai o se tiakono, e le mafai ona e toe oo i se tofi o le Ekalesia Aoao, ae o le a tuu atu i le faifeau toeaina o le pulega o lo o e galue ai mo le faia o lou faasalaga. Lotu a Tamaiti E faatauaina tele e le Ekalesia LMS Samoa aso faapitoa mo fanau i tausaga ta'itasi, ae ua tuuina atu lava i le atunuu latou i se aso malolo o lea atunuu i se Aso Gafua o Oketopa e faataunuuina ai le Aso Sa o Tamaiti. Ua faaiugafonoina lenei vaega, ona e tatau lava ona mae'a le Lotu a tamaiti i le Aso Sa, ae tua i se Aso Gafua malolo o lea atunuu, e malolo mai ai fanau i masina sa taumafai mai ai le tapenaga mo lo latou aso. Aso Sa o le Tala Lelei E matua faatauaina tele e le Ekalesia LMS Samoa lea aso e faamanatuina i Aso Sa muamua o Setema o tausaga ta'itasi, e manatunatu ai i le aso na taunuu ai le Tala Lelei i laufanua o Samoa talu mai le tausaga e 1830. E potopoto faatasi matagaluega uma i se falesa e tasi e tapua'i ai ma faia ni taulaga pese ma talotaloga, ma faafetaia le alofa o le Atua na mafua ai ona taunuu atu lona finagalo e faavae ai Samoa, ma faatalaleleina ai ona tagata. O le Faasologa o Sauniga lotu i Aso Sa O sauniga lotu a aulotu i Aso Sa ta'itasi e ta'ita'ia lava e le faifeau o le aulotu po o se a'oa'o fesoasoani. E fa pese ua faatulagaina e taina i le okeni po o se piano, ae le faatagaina ai ni mea fai faaili. A uma le valaau e tapua'i, a le faifeau ona sosoo lea ma le pese muamua, o le faitauina o le Afioga a le Atua i le Feagaiga Tuai ma le Feagaiga Fou, ona sosoo lea ma le pese lona lua. O talosaga molia e ala i le Tatalo Faafetai, Faatoesega, ma le Tatalo o Manaoga. O le pese lona tolu ma aoina ai le foa'i. O le faapaiaina o le taulaga ma le lauga, ona sosoo ai lea ma le pese mulimuli, ma le tatalo faamanuia, o folafolaga a le failautusi ma tuua ai loa. O lea faasologa ua fuafuaina ia laugatasia ai uma aulotu a le LMS Samoa i so o se atunuu, ia leai se aulotu e fia ese mai ai. Aulotu e fia faaofiina mai O ni aulotu fou e fia faaofiina mai i totonu o le Ekalesia LMS Samoa, ia fesoota'i atu i le Faifeau Toeaina o lo o taulalata atu o le atunuu o lo o galue ai po o le fesoota'i foi i le Faatonu aoao po o le Ta'ita'i Fono. O le faifeau toeaina lava o le atunuu o lo o fia faatuina mai ai lena aulotu na te faia le faaiuga ma faaulufale mai ai loa lena aulotu, ae le mafai ona faaaogaina se faifeau ua finagalo i ai pe afai ua faaulufale mai se'i vagana ua talia atu e le Faatonu ma le vasega o le au toeaina e ala i ni sailiiliga mae'ae'a e faia. O le faamoemoe ia taumafai lava e faaaoga le aufaigaluega ua faasauni atu mo le galuega i totonu lava o le lotoifale o le ekalesia aoao. Faifeau mai se isi Ekalesia e fia galue i le LMS Samoa Ua uma ona aiaia i le faavae nisi o le aufaigaluega mai nisi ekalesia e ofi mai ma fia galulue e avea ma faifeau i totonu o le LMS Samoa, pe ua fia faaulufale mai foi sana aulotu i totonu. Ia matua silasila toto'a le faifeau toeaina i lea pulega i tulaga uma e aafia ai le nofo lelei o ekalesia, ia logo i lea auauna, e mana'omia se tusi faamaonia mai le ekalesia sa galue ai, pe ua mafua i se a ona tuua le mafutaga ma lea ekalesia. Afai ae maua mai le tusi lea mai se ta'ita'i o lea ekalesia ma faailoa mai o lo o alu ese mama lava lea auauna ona faaaogaina lea, ae afai ae le maua mai se tusi, ae faaupu mai lava e le uso i ona lagona le mafuaaga, e le mafai lava ona taliaina. O le faamoemoe ina ia aua nei avea le LMS Samoa e fai ma alofaga o nisi o le aufaigaluega, a faasala mai le ekalesia o lo o galue ai, ona oo mai lea i LMS mo le fia faauauina o ona tofi. E tatau lava foi i lenei ekalesia ona faamamalu i aiaiga ma faasalaga a nisi o ekalesia ua uma ona i ai. O se tau faapulapulaga lena o le Ekalesia LMS Samoa, e pei ona toe taulalagaina ai. Soifua: Reverend Elder Peniamina Tuigamala (Faatonu Aoao) |
|
|
