LMS Samoan Church

Ua toe filifilia nei e le Fono Tele ia Aperila o le 2010, le laulau a fono a le Ekalesia Aoao e lagolagosua i le Susuga i le Ta'ita'i Fono le Afioga ia Leauma Mikaele Po'a, ma ua filifilia ai le Susuga ia Mauaiseaso mai Aukilani Niu Sila, e avea ma Failautusi, ae o le faletua ia Elizabeth Tuigamala e avea ma Teutupe a le Ekalesia aoao.

Ua talia foi e le fono a le autoeaina le talosaga ina ia avea le Ta'ita'i Fono o tula'i mai nei i le foe o le Ekalesia ma Toeaina, e auai atu ai i Fono a le autoeaina, e faafofoga ai mataupu o lenei fono e saunia ai o ia mo le fono tele e faigofie ai ana faaiuga fai.

Ua talia foi e le laulau a le Ekalesia le talosaga, ina ia faailoa atu e le nusipeapa a le Ekalesia o lo o i ai nei ua faaigoaina o le Ta'iala Faaleagaga, mataupu uma na talanoaina e le fono tele ma ua pasia, atoa ai ma suafa o a'oa'o uma ua pasi i le suega i lea tausaga, mo le silafia ai e i latou o lo o faamuli mai i aulotu, e le'i auai mai i le Fono Tele, ma ia faaoo atu i le lomiga o Me pe a mae'a le fono .

O lo o tumau pea le faataunuuina o Fono Tele a le Ekalesia Aoao ia Aperila i aso malolo o le Aso Maliu ma le Eseta. O le afiafi o le Aso Tofi a'o lumana'i le Aso Maliu e amataina ai le Fono a le autoeaina ma faasolo ai lava le Fono Tele e amataina i le Aso Faraile o le Aso Maliu seia faamaeaina ma taape ai i le Aso Gafua o le Eseta.

O Fonotaga uma lava e usuia i Ausetalia i Brisbane i le nofoaga tutotonu o le Ekalesia LMS Samoa, 31 Kurrajong Street, Woodridge, Brisbane, ma o le nofoaga foi lena e feiloa'i uma ai usufono mai fafo i le Aso Tofi a'o lumana'i le fono Tele.

Ua autasi foi finagalo o le Fono Tele, ina ia tatala aloa'ia e le Afioga i le Faatonu Aoao fono uma ma toe tapunia.