FAAMOEMOEGA MA SINI O LE EKALESIA |
||
O le faamoemoe ma le sini autu o le toe faaolaolaina lea o le Suafa sa lauiloa ai le Ekalesia i ia ona po o le LMS Samoa. I lenei vaitau ma le faavae ua toe lalagaina nei o le faamama avega lea i aiga vaivai, aemaise ai ia e silasila muamua i le atina'e o lou aiga ina ia manuia, ona manuia lea o le Tala Lelei ua o tatou galulue ai.
O le sini autu lava o le fia faaolaolaina lea o agaga na mafua ai ona faia le Tala Lelei, ma o le finagalo foi lea o le Atua. E moni o lo o ta'ua i le Tusi Paia, e le tupu le faatuatua pe a leai ni galuega, ae i le lagona o le Faavae a le LMS Samoa, o galuega na e faia i le loto malie, ma le mea e gata ai le mafai, ae le o galuega e faamalosi pe faatauvaga ona fai, e oti ai le agaga galue o le tagata. E matua faasaina lava i le faavae o le Ekalesia Aoao, le faia o ni faiga taulaga, o le mafuaaga e le faatagaina ai ona ua fai faatauvaga ai ma tosoaina atu ai ma le aiga vaivai, ae faaletonu ai mea totogi, ma le aai ai ma le aiga aemaise lava o atunuu i fafo. Afai ua tele se tamaoaiga ua ia te oe, ma ua e manatu ai e fia faia se foa'i mo le Ekalesia Aoao po o le aulotu foi o lo o e galue ai, e mafaia ona fai i se auala o se mealofa ona faatoa talia lea. E le mafai foi ona tolaulauina ni tulaga tau le foa'i i totonu o le falesa, e pei o faigamealofa i le aufaigaluega faifeau. E ao uma lava mealofa i le failautusi a'o le'i amataina le sauniga, ona folafola lea o le aofaiga o le faigamealofa a le aulotu pe a mae'a le sauniga, o le faamoemoe ina ia taofia ai le faalumaina o nai uso o lo o itiiti le foa'i, ma ia faia lava o se mea ua maua ma mafai. E tasi lava le ie e faatagaina e le Ekalesia aoao, e faaaogaina i faalavelave tau maliu, ua na o le ie o le mavaega, e le toe faaaogaina foi e le ekalesia, ie toga laiti ua ta'ua o lalaga. O le sini autu foi o lenei faavae ia faamasani ai tagata lotu uma o le Ekalesia LMS Samoa i le galulue faatasi atoa ai ma le silafia o le tulaga o le ati a'e o aiga ina ia manuia. O lo o i ai le faamoemoe o le Ekalesia ina ia silasila toto'a ai i le faatauaina o tupulaga i totonu o faapotopotoga. O le ala lea o le faamalosia pea o aulotu uma i totonu o le LMS Samoa, ina ia taumafai e faavae aoga Aso Sa ma autalavou, ina ia faatonutonu folau ai alo ma fanau a le ekalesia io latou olaga talavou, aemaise ai ina ia malamalama i lona siosiomaga ma vaavaai atu ai i sona manuia o lo o taoto mai le lumana'i. O lo o taumafai polokalame o lo o saunia atu e le Ekalesia Aoao e faatatau lava i le taua o tupulaga ma so latou sao i totonu o aiga ma ekalesia. Ua o tatou silafia nei ona po i le tele o faafitauli e tutupu mai ona o tupulaga talavou, e mafua ona o le lava o le iloa o le tamaititi i mea o le olaga, e le'i lava se taimi e faamatalatala auiliili ai e matua faigata e tutupu mai pe a aafia ai ma lona siosiomaga, e ala i totonu o aoga ma taaloga, ae avea polokalame ua saunia ma ala o se vaifofo i tupulaga fai a'e a le ekalesia aoao, ina ia taunuu ai i se lumana'i manuia pe a matutua. Ia manatua, ia a'oa'o le tama e tusa ma ona ala, a oo ina manatua, e le toe te'a ese ai.   |
   |
|
